Pages

Monday, February 14, 2011

मायाका कुरा



मैले
अप्ठेरोमा हात दिने कुरा गरेँ
एक्लोपनमा साथ दिने कुरा गरेँ
जंघारहरू सँगै तर्ने कुरा गरेँ
लामो यात्रा सँगै गर्ने कुरा गरेँ

तिमी भन्छ्यौ
मैले मायाको कुरै गरिनँ ।

तिमीले
आलिङ्गनका कुरा गर्‍यौ
चुम्बनका कुरा गर्‍यौ
अनि स्पर्शका कुरा गर्‍यौ ।
भन,
तिमीले कहाँ मायाका कुरा गर्‍यौ ?



छाडेर आमाको काख
तिम्रो अँगालोमा आफूलाई बेर्न म सक्दिनँ
बनाएर तिमीलाई खुसी
आमाको मुहारमा उदासी हेर्न म सक्दिनँ
र त मैले
सधैँ साथ साथ बढ्ने कुरा गरेँ
अग्ला चुलीहरू सँगै चढ्ने कुरा गरेँ
र तिमी भन्छ्यौ
मैले मायाको कुरै गरिनँ ।

तिमीले
भएभरका सम्बन्धहरू तोड्ने कुरा गर्‍यौ
तिमीसँग नाता गाँस्न
आफ्नालाई छोड्ने कुरा गर्‍यौ
भन
तिमीले कहाँ मायाका कुरा गर्‍यौ ?