Pages

Wednesday, June 10, 2009

ए, अँध्यारोविरुद्ध लड्ने मान्छे !


छोप्दै छोपिन्न भने हत्केलाले सूर्यका रोशनीलाई
रोकिन्न भने कुनै शक्तिले पृथ्वीको गतिलाई
जाडो घट्दै घटेन नभन
अन्धकार हट्दै हटेन नभन
ए, अँध्यारोविरुद्ध लड्ने मान्छे !
कुहिरोले छोपेको मात्र हो धरती
बादलले ढाकेको मात्र हो आकाश
सूर्य उदाउँदै नउदाएको होइन
घाम लाग्दै नलागेको होइन ।

रक्तिम किरणले अन्धकार पछार्नै लागेको बेला
लामो निद्रामा अलमलिएकाहरु आँखा मिच्दै जागेका बेला
पूर्व फाट्दै फाटेन नभन
उज्यालो हुँदै भएन नभन
ए, उज्यालोको गीत गाउने मान्छे !
हुन मात्र बाँकी हो बिहान
सुन्न मात्र बाँकी हो भालेको डाक
रात ढल्दै नढलेको होइन
तारा झर्दै नझरेको होइन ।



पाखामा रक्ताम्ये लाली गुराँस फुलेका बेला
घामको स्वागतमा मुस्काउँदै सूर्यमुखी झुलेका बेला
कोइलीले गाउँदै गाएन नभन
वसन्त आउँदै आएन नभन
ए, वसन्तलाई खोजी हिँड्ने मान्छे !
उड्न मात्र बाँकी हुन् भँवरा
डुल्न मात्र बाँकी हुन् पुतली
फूल फुल्दै नफुलेको होइन
शिशिर हट्दै नहटेको होइन ।

7 प्रतिक्रिया:

gufgaf.com said...

एकदमै राम्रो कविता !! मनपर्‍यो !

Milan said...

उत्प्रेरक र convenes गर्ने कविता...मनपर्यो...

B.J. Dummali said...

Great poem and pic, Keep it up, and Thank you for sharing to all.

कृष्णपक्ष उज्यालोको खोजिमा said...

सकारात्मक भावना र उत्साह उमार्ने सुन्दर कविता !

दूर्जेय चेतना said...

मलाई पनि एकदमै मन पर्‍यो।
"बादलले ढाकेको मात्र हो आकाश
सूर्य उदाउँदै नउदाएको होइन
घाम लाग्दै नलागेको होइन"
बिशेष !!!!

Dilip Acharya said...

समाजमा सबैतीर आक्रोश, नैराश्य र वैमनस्यता फैलिन लागेको र लेखनीमा पनि समाजको त्यहि बिम्महरुनै सबैतर्फ हावी भएक बेलामा तपाईको सकारातम्क भावले केहि भए पनि जोश र नयाँ उर्जा दिएको छ।

म आशा तथा कामना गर्छु तपाईका हरेक अन्तिम २ हरफहरु सहि निक्लिउन:

सूर्य उदाउँदै नउदाएको होइन
घाम लाग्दै नलागेको होइन ।

रात ढल्दै नढलेको होइन
तारा झर्दै नझरेको होइन ।

फूल फुल्दै नफुलेको होइन
शिशिर हट्दै नहटेको होइन ।

एबमस्तु !

rajkumarirai5@gmail.com said...

oh ! i like this poem

Post a Comment